UNESCO
UNESCO

Frettir

Íslenska ICOMOS-nefndin endurvakin

Íslenska ICOMOS-nefndin, sem er samtök íslenskra aðila að "International Council on Monuments and Sites (ICOMOS), hélt aukaaðalfund þann 4. desember 2014 og þar fór fram stjórnarkjör. 

Í stjórn voru kjörin:
Guðný Gerður Gunnarsdóttir, formaður
Elín Ósk Hreiðarsdóttir, gjaldkeri
Snorri Freyr Hilmarsson, ritari.

Íslenska ICOMOS nefndin starfar í anda markmiða alþjóðasamtakanna, að verndun og viðhaldi menningarsögulegra minja og umhverfis þeirra og er reiðubúin til að taka þátt í verkefnum sem unnið er að til verndar íslenskum menningarminjum og menningararfi.

Síðast uppfært (Föstudagur, 11. mars 2016 09:25)

 

Tilnefning víkingaminja á heimsminjaskrá UNESCO

Fimm ríki, Danmörk, Ísland, Lettland, Noregur og Þýskaland, tilnefna í sameiningu margvíslegar minjar frá tímabili víkinga til heimsminjaskrár UNESCO. Framkvæmdastjóri heimsminjaskrár UNESCO, Kishore Rao, tók við tilnefningarskjölunum við athöfn í höfuðstöðvum UNESCO í París 28. janúar sl.

Undirbúningur að tilnefningunni hefur staðið í tæp sex  ár undir forystu mennta- og menningarmálaráðuneytisins í samstarfi við yfirvöld í hinum ríkjunum.

Sjö staðir eru tilnefndir og þeir eiga sameiginlegt að þar eru nokkrar mikilvægustu minjarnar um víkingana í fræðilegu tilliti sem taldir eru hafa mikla þýðingu á heimsvísu auk þess að skipta máli í sögu þjóðanna á 8. til 11. öld. Staðirnir eru:

  • Þingvellir á Íslandi,
  • Jelling og Trelleborg í Danmörku,
  • Grafreitir og búsetuminjar í Grobina í Lettlandi
  • Skipshaugar í Vestfold og kvarnarsteinsnámur  í Hyllestad  í Noregi
  • Heiðarbær og Danavirki í Slésvík-Holtsetalandi í Þýskalandi.

 

Raðtilnefningar víkingaminja

Ísland hefur verið í forystu fyrir alþjóðlegri raðtilnefningu á minjum frá víkingatímanum í samræmi við ákvörðun ríkisstjórnarinnar frá 10. ágúst 2007. Tilnefndir eru staðir á heimsminjaskrá UNESCO sem tengjast menningu víkinga í samstarfi við Danmörku, Lettland, Noreg og Slésvík-Holtsetaland. Í þessari raðtilnefningu eru staðir sem þegar eru fyrir á skránni, s.s. Þingvellir og grafhaugarnir og kirkjan í Jelling í Danmörku auk nýrra staða sem þjóðirnar leggja til, alls sjö staðir.

Hvert þátttökuríki undirbýr sinn þátt í raðtilnefningunni og á Íslandi hefur verið haft samstarf við starfsmenn Þingvallaþjóðgarðs og Þingvallanefnd.

Þetta er flókið og mikilvægt verkefni sem nýtur athygli á alþjóðavísu enda er hér um nýja nálgun við heimsminjasamninginn að ræða. Minjastofnun Íslands hélt utan um alþjóðlega hluta verkefnisins. Verkefninu er stjórnað af alþjóðlegri verkefnisstjórn sem skipuð er fulltrúum þátttökuríkjanna. Formaður verkefnisstjórnarinnar er Ragnheiður H. Þórarinsdóttir deildarstjóri í mennta- og menningarmálaráðuneyti.

Tilnefningaskjalið var afhent heimsminjaskrifstofu UNESCO í París  og eftir það tekur við langt matsferli. Umsóknin verður væntanlega tekin til umfjöllunar í heimsminjanefnd UNESCO sumarið 2015.

Á myndinni eru:  Ragnheiður H. Þórarinsdóttir, Kishore Rao og Claus van Carnap Bornheim þjóðminjavörður Slésvíkur-Holtsetalands.

Síðast uppfært (Miðvikudagur, 12. febrúar 2014 10:22)

 

Surtsey 50 ára

Í tilefni 50 ára afmælis Surteyjar, 14. nóvember, var Ríkisútvarpið með umfjöllun um eyjuna og tilurð hennar, sjá frétt á ruv.is.

Síðast uppfært (Miðvikudagur, 12. febrúar 2014 10:23)

 

19 staðir samþykktir á heimsminjaskrá

Á fundi heimsminjanefndar UNESCO sem haldinn var í Kambódíu 16. til 27. júní síðastliðinn voru 19 staðir samþykktir á heimsminjaskrána. Meirihlutinn, eða 14 staðir, flokkast sem menningarminjar. Sem dæmi má nefna staði eins og Bergpark Wilhelmshöhe í Þýskalandi, Hvalveiðistöðin Red Bay í Kanada og Coimbra háskólinn í Portúgal. Margir áhugaverðir staðir eru á þessum lista og ætti fólk endilega að kynna sér hann frekar. Nánari upplýsingar má finna á eftirfarandi vefslóð: http://whc.unesco.org/en/newproperties/

 

 

Unnið að því að koma Torfajökulsöskju á lista

Í Morgunblaðinu, 2. mars 2013, birtist lítil frétt um að Ísland stefni að því að koma Torfajökulsöskju á heimsminjaskrá UNESCO. Ragnheiður Þórarinsdóttir, sérfræðingur hjá Mennta- og menningarmálaráðuneytinu, svarar þar fyrirspurnum fréttamanns. Segir hún m.a. frá því að fræði- og vísindamenn hafi unnið að rökstuðningi fyrir því hvers vegna svæðið eigi að vera á heimsminjaskrá. Fljótlega verði sent formlega erindi til Parísar þar sem UNESCO tekur málið fyrir.

Sjá http://www.mbl.is/frettir/innlent/2013/03/02/torfajokulsaskja_a_lista/

 
Fleiri greinar...